Dans og stress

Loksins byrjuðu dansæfingar hérna í skólanum. Kíkti í fyrsta skipti í gær, en það var svona byrjendatími í Rhúmbu og klukkutíma síðar lengra komnir í Social Foxtrot. Fullt af fólki, þar af heljarinnar margir úr tölvunarfræði. (Hélt að svoleiðis nörd væru bara heima í tölvunni...) Fór einmitt með búlgaskri snót hérna úr deildinni sem hefur einnig dansað talsvert áður. Af þeirri ástæðu voru tímarnir örlítið pínlegir, en til að gera langa sögu stutta fer ég í kvöld í prufu fyrir keppnislið Cornell í dansi. Ef maður kemst inn er það að vísu svolítil binding, því þetta eru a.m.k. fjórir tímar af dansi á viku. Sjáum til hvernig fer. En ofsalega er nú gaman að geta farið að dansa aftur.

Ákvað að skoða prófbókina fyrir fagið sem ég náði helmingnum í. Allt eðlilegt þar til á síðustu síðunni, en þar var ritað "-12 Absent" fyrir eina spurninguna. Eftir smá umhugsun komst ég að því að kjáninn ég hafði tekið eina svona fylltu-inn-í-eyðurnar spurningu og leyst hana á prófblaðið sjálft (í stað þess að færa það inn í prófbókina)! Svona er maður snjall. Kíkti strax á kennarann og spurði hvort hann gæti nokkuð litið á prófblaðið mitt. Þá kom svona "æ!" svipur á hann og hann sagði mér varlega að þau hefðu öll verið send í endurvinnsluna. (það kom svona grá hugsunarblaðra á mig eins í teiknimyndasögunum).Við ákváðum á endanum að ég skyldi leysa spurninguna aftur í beinni fyrir hann á töflunni. Þetta er nú það mest stressandi munnlega próf sem ég hef farið í því prófessorinn gerði þetta að algjörri yfirheyrslu, "ertu nú ALVEG viss? hvað ef þetta og þetta? hvað er annars þetta? ertu alveg viss?" Að lokum þegar ég hélt að hann myndi bara að hlæja að lausninni minni (sbr. "guð, hvað þetta er kolrangt hjá þér auminginn þinn!") sagði hann að hún væri hárrétt og skyldi hækka mig. Þetta endaði með því að ég hamingjusamlega náði öllum þremur prófunum sem ég reyndi við. Sama kom fyrir hann Georgios sem fékk einmitt svipaða hækkun í sama fagi (þeir skyldu ekki skriftina hans og nenntu ekki að lesa ritgerðarsvörin sem hann gaf við stuttum spurningum). Svo hér ríkir mikil gleði, eins sjá má á þessum geðsjúklingum á myndinni.

Annars er dagurinn í dag heldur þjappaður. Í upphafi er kennslustund úr 615 - Peer-to-peer systems sem krafðist lesturs á þremur stórum tímafrekum greinum, því næst er fyrsta kennslustundin mín sem ég þyrfti sannarlega að fara að undirbúa, og að því loknu er ég með tæknilega umsjón yfir svona colloquium (stórum fyrirlestri). Þá þarf maður að undirbúa eigin fyrirlestur sem ég held fyrir krakkana hérna sem hittast annað kvöld í Fræðilegur umræðuhópur (sem hljómar ferlega hallærislega á íslensku) sem rabbar saman um það sem er að gerast í fræðilegri tölvunarfræði og kynna nýlegar greinar af ráðstefnum og svona. Þurfum svo að kaupa okkur flugmiða til Utah yfir vorfríið (sjá fyrra blog). Fullt af fjöri! Myndin hér til hliðar er annars öllu ótengdur pólítískur áróður.


Fimmaurabrandarar öðluðust nýja merkingu þegar ég heyrði þennan: "Hvað er grátt? Veit ekki...? Bráðnuð mörgæs!" (Mér er ávallt hugsað til Baldvins þegar ég heyri svona).
Annars má finna nokkuð skondin samskipti milli Kanadabúa og Bandaríkjamanna hér. (Að vísu er sagan ekki alveg sönn eins og má sjá hér, en það sakar ekki). Talandi um Baldvin, (hæ Baldvin!) þá var kappanum um og ó yfir aðför mína að nafninu "Sturlu" og sendi mér hvorki meira né minna en lista yfir allar Sturlur heimsins og var reiðubúinn að fórna geit ef þær væru ekki allar karlkyns. Þvílík sturlun, ég sem var bara að gera létt grín :-)

Annars á hún Röskva systir (eða Rölla eins og hún kallar sig) afmæli í dag og fer því að nálgast tvítugsaldurinn! (Ef ég reikna rétt verður hún 14 ára). Til hamingju með afmælið (til hammó með ammó!). Vona að pakkinn sem ég sendi fyrir viku síðan fari nú að skila sér, efast um að tollurinn hafi nokkurn áhuga á honum. Þarf nefnilega að deila með heiminum hvað ég setti í hann (hehe)...

Það hefur verið talsverð þátttaka í síðustu þraut (hvað er í glösunum?) og eins og staðan er núna hefur einum þátttakanda tekist að giska á 3 innihöld af 4. Hér er smá hint: Tvö glös eru með ávaxtasafa (ber, grænmeti og gos eru ekki ávextir, a.m.k. ekki ennþá). Munið að þið megið giska eins oft og þið viljið! Hér svo enn ein myndin af glösunum til að hjálpa til.

Eilífar skemmtanir

Mikið var nú gott að kíkja aðeins á skíði í morgun! Hvorki meira né minna en 10 stiga hiti og heiðskírt, flottur snjór og stórar brekkur. Varla hægt að fá það betra. (*gortgort* veit nefnilega að það er ekki skíðaveður heima). Hér til hliðar má sjá mig að spóka mig í barnabrekkunni. Þessi fíni skíðastaður nefnist Greek Peek og er í u.þ.b. hálftíma akstursfjarlægð frá skólanum. Allar lyftur (slatti af þeim, a.m.k. 10 stykki) eru stólalyftur. Mismiklar raðir, sumar heldur langar. Fengum annars klabbið á spottprís með einhverjum tilboðsmiða, passi í fjallið og skíðaleiga á 20$, prýðilegt það. Að vísu á svo að rigna á morgun svo snjórinn er sennilega á förum að sinni. Vonum bara að það snjói meira síðar veturs.

Sá Corpse Bride í bíó í gær og var hæstánægður. Að vísu er Nightmare before Christmas enn í meira uppáhaldi, en þessi var hressilega góð með afbragðstónlist og ómetanlegu Tim Burtonsku "touch". Fór kvöldið áður á myndina Underworld Evolutions og hefði betur sofið (eða horft á auglýsingar, sjá fyrra blog). Myndin er framhald af sennilega enn verri mynd sem fjallar um vampírur og fleiri ófreskjur í einhverju súru ofurhetjubardagaplotti. Hugmyndabrunnurinn hjá Hollywood er greinilega löngu tómur. Það líður ekki á löngu áður en við sjáum myndir á borð við Battlefield Mars og Alien vs. Santa Claus, ja eða endurgerð af Forrest Gump eða jafnvel endurgerð af endurgerðinni af Psycho. (*andvarp*)

Annars eru þessar skemmtanir svona hluti af prófloka- fögnuði, komst að því að ég náði 2.5 af þeim þremur prófum sem ég þreytti sem er víst nokkuð gott. Já, hvað er þessi hálfi þarna? Þannig er mál með vexti að þeir skeyta saman fögum í prófin þannig að maður getur dansað í spurningum tengdu öðru faginu en ekki hinu og þannig náð bara helmingnum af prófinu. Þetta þýðir að ég þarf að kíkja eitthvað í einn kúrs í haust. Annars er hljóðið ekki jafngott í hinum félögunum og þungt yfir mörgum. Enn aðrir bruddu þetta eins og brjóstsykur að vanda. En þetta er ágætt að sinni.

Talaði við Schneider og Kleinberg um rannsóknir nú í vikunni. Schneider er að vinna að mjög fræðilegum öryggismálum, nánar tiltekið leiðum til að gera forrit sem eru þegar keyrandi öruggari með því að nota tegund af "obfuscation" til að gera möguleikana á vel heppnaðri árás á forritið hversu litlar sem vera skal, þó svo að forritið sé enn tæknilega séð óöruggt. Kleinberg stakk upp á því að skoða tengslanet og að reyna að búa til stærðfræðilegt módel (sennilega leikjafræðilegt) af því hvernig einhver mælikvarði (t.d. hvaða einstaklingar hafa "góð tengsl"). Er núna með bunka af ritgerðum til að lesa ofan á það sem er. Já, annars er mynd hérna af mér og félögunum í Flórída sem tengist textanum á engan hátt. Fjör.

Baldvin sendi inn þetta fínu lausn á Þraut 4:
Gerum ráð fyrir að þegar Sturla er að leggja af stað niður Esjuna þá leggi Snorri af stað upp Esjuna og fylgi nákvæmlega sömu slóð og Sturla og tíminn sé einnig sá sami; þ.e. Snorri fetar nákvæmlega í fótspor Sturlu. Þau leggja svo af stað klukkan tólf og gefur augaleið að þau mætast að sjálfsögðu á leiðinni og þegar það gerist er Sturla á nákvæmlega sama stað og tíma og daginn áður.
Smáviðbót: Þetta gerist nákvæmlega einu sinni ef Sturla hefur farið beina leið upp og beina leið niður. En auðvitað er mögulegt að Sturla hafi runnið til og oltið smáspöl niður á við en haldið ótrauð áfram. Þannig getur verið að margir slíkir staðir séu til en þá þarf greyið Snorri líka að rúlla sér niður Esjuna af og til.

Nákvæmlega, klónum bara Sturlu og sendum hana upp - hún hlýtur að hitta upphaflega eintakið af sér á leiðinni.


Að launum hlýtur Baldvin ANNAN MJÓLKURHRISTING sem má nota í annarri ferð til Íþöku. Þetta ætti að vera mikið hvatning fyrir kappann að koma sem oftast í heimsókn, enda eru prýðisbeljur á svæðinu sem framleiða ágætis mjólkurhristinga.

Baldvin var reyndar haldinn þeirri ranghugmynd að Sturla sé karlmannsnafn, en slíkt er fásinna. Nafnið endar á 'a' og beygist eins og 'kona' eða 'mamma' og því má rökfræðilega álykta að um kvenkynsnafn sé að ræða. Að sjálfsögðu er þá ljóst að sjálfur Snorri Sturluson hefur fengið eftirnafnið sitt frá móður sinni, Sturlu.

Fyrst þetta er nú afgreitt, þá er komið að stóru stundinni:

Þraut 5: Hvaða drykkir eru í þessum glösum?


Þá er að fara að skella sér í að elda kjúkling og horfa á Brokeback Mountain sem hefur hlotið lof gagnrýnenda (og bann í Kína). Seinna! (Later!)

Auglýsingar og fleira sniðugt

Fór í gær í tíma í 615 - Peer-to-peer systems sem á að fjalla um allt sem tengist slíkum skáarskiptikerfum (á borð við BitTorrent), bæði frá fræðilegum forsendur sem og hagnýtingum. Það eru gerðar stífar vinnukröfur í þessum áfanga. Í fyrsta lagi á maður að lesa 2-3 ritgerðir fyrir hvern einasta tíma. Til að sýna að maður hafi gert það á maður að senda útdrátt úr greininni á kennarann auk þess sem að við eigum að finna veikleika á hverri einustu grein. Það verða stór forritunarverkefni þar sem maður á að útfæra svona kerfi, regluleg heimadæmi, maður á að velja sér pappír til að lesa í kjölinn og flytja um hann fyrirlestur og í lokin á maður hafa rannsakað eitthvað og skrifa um það ritgerð sem hægt er að gefa út. Maður er nú að velta því fyrir sér hvort þetta álag verði ekki banvænt til viðbótar við allt það sem ég ætla mér að gera þetta misserið, en við sjáum til hvernig fer. Skólinn er mjög líbó á skráningu í og úr kúrsum, slíkt má eiginlega gerast hvenær sem er.

Ég skil ekki auglýsingar. Það er bara eitthvað element við þær sem ég fatta ekki. Hér í Kanaveldi er þetta náttúrulega sérstaklega slæmt. Hver einasta klukkustund í sjónvarpi er brotin niður í a.m.k. þrjá hluta, og þar er skellt á auglýsingum í TUTTUGU mínútur af hverjum KLUKKUTÍMA! Þetta eru heldur ekki einhverjar stuttar "Tómatar, tómatar. Blómaval." auglýsingar heldur löng viðtöl við notendur einhverrar úldinnar vöru og alls kyns lygar um ágæti hennar. Svo standa svona "útskýringar" neðst á skjánum um skilyrðin fyrir vörukaupunum, þ.e.a.s. smáa letrið, sem eru oftast ógnvægnlegri en auglýsingin sjálf (t.d. valda ákveðin verkjalyf "rassleka" (anal leakage)). Týpísk auglýsing snýst um fjölskyldu sem lifir við eitthvað kunnuglegt ástand, nema hvað þar er eitthvað að: borðið er of lítið svo fólk kemst ekki að því, einhver krakki er að grenja, skrapatólsbíllinn bilar. Lausnin er alltaf að kaupa einhverja vöru, t.d. risaborð með einhverjum hræðilega kjánalegum fídusum, barnahöfuðverkjapillur eða nýjan rauðan Ford pickup trukk. Þetta getur líka verið svo langsótt - hvern langar eiginlega í broddgölt sem þú getur vökvað svo það vaxi gras á bakinu á honum?
Ég sé þetta í líkamsræktinni hérna á heimavistinni minni en þar eru iðulega fólk sem er sífellt með kveikt á sjónvarpinu. Ég fer alltaf að hlæja þegar ég sé auglýsingar (og marga þætti líka) en fólk lítur bara á mig með svona svip "Uss, ég er að reyna að horfa á auglýsingar!". Þar til núna fyrir tveimur dögum áttaði ég mig á því að ástandið er verra en það er, fólk er að vísvitandi að skipta um stöðvar til að HORFA Á MEIRI AUGLÝSINGAR!! Þegar þær klárast á einni rás er hoppað yfir á næstu! Mér verður bara bumbult. Þetta neyslulíferni sem er verið að byggja upp: endalaust ruslfæði (þar snúast auglýsingarnar yfirleitt um hvað það sé nú erfitt að elda sjálfur og hvað það fari auðveldlega úrskeiðis), bílar, óþarfa hlutir á borð við munnsprey og bakteríudrepandi sprey fyrir klósettið, gosdrykkir, sætindi og SNAKK, og endalaust af lyfjum á borð við verkjatöflur og kveflyf - ef þú hnerrar einhverntímann þýðir það að þú eigir að nota þau. Fólk virðist engan veginn gera sér grein fyrir því að auglýsingar eru þarna af ástæðu: Þær virka. Allir halda að þeir séu algjörlega ónæmir fyrir þeim, en þegar maður fer að versla og svona leitar maður í vörumerkin sem eru kunnugleg. Og þau eru kunnugleg því það er búið að heilahreinsa þig með þeim á tuttugu mínútna fresti í margar vikur. Þetta er líka svo rangur kvarði á gæði, þarna sigra þeir framleiðendur sem auglýsa meira með drasl vörur þá sem hafa betri vöru (oftast heilnæmari) en eyða ekki jafnmiklum peningum í auglýsingar. Og hver borgar svo fyrir allar þessar auglýsingar á endanum? Jú, mikið rétt. Við, neytendurnir. Algjört rugl.

Ástandið er kannski örlítið betra heima, en fer versnandi. Í það minnsta ætla ég aldrei að fá mér sjónvarp hérna úti, Málið er þótt maður eigi ekki svoleiðis er maður engan veginn hólpinn því allt í kringum mann, dagblöðin eru stútfull og maður opnar ekki póstkassann án þess að þar séu kíló af ruslpósti með gyllitilboðum, "Buy 1 - Get 1 free!", "Buy rusl AND GET FREE rusl", "FREE DELIVERY!!". Það er ekki heldur hægt að selja manni einn hlut á hálfvirði heldur verður að kaupa einn á fullu verði og fá annan eins ókeypis. En mig bara vantar eiginlega aldrei svona mikið af þessum hlut sem ég er að kaupa! Ótrúleg neysla.

Fréttirnar eru sér kafli út af fyrir sig, en til að heyra meginuppistöðuna má skoða þetta ágæta myndskeið.

Svona til að sleppa við auglýsingar hef ég verið að sækja nýju seríuna af 24 af netinu í gegnum Bittorrent. Þar lenti ég í því til að taka þátt þarf ég að uploada jafnmikið og ég downloada. En það er bara stærðfræðilega ómögulegt, um leið og einhver þátttakandi uploadar meira en hann downloadar er einhver annar sem getur ekki uppfyllt þessa kröfu (hann þarf að downloada meira en hann uploadar) því meðaltal upload/download yfir alla notendur er jú 1.0. Sérlega súr krafa.

Hér byrjaði svo að snjóa upp úr þurru, allt hvítt þegar ég vaknaði í morgun. Núna er 8 stiga frost sem ég veit ekki hvaðan kom, en á föstudag verður 6 stiga hiti. Undarlegt veðurfar. Það snjóar víst líka í Aþenu sem verður að teljast til tíðinda, enda er þar hreinlega allt lokað sem stendur. Hef samt ekki enn komist í nógu góðan snjó til að kenna fólki að byggja snjóhús. Vona að slíkt tækifæri gefist áður en það fer bara að vora hérna. Þetta hefur víst verið sérlega mildur vetur. Hér á myndinni má aftur á móti sjá fyrri vetur sem voru ekki jafn mildir. Þetta er stífla hérna rétt hjá skólanum.

Fékk svo loksins myndir frá hinum strákunum úr Flórída-ferðinni okkar. Held að ég reyni að setja inn reglulega skammta hingað á bloggið af vel völdum myndum. Byrjum á deprimerandi kaflanum í Miami sem eru myndir af minnisvarða gyðinga sem dóu í helförinni. Sérlega áhrifaríkur minnisvarði eins og þessar myndir bera vitni (smellið til að fá stærri útgáfu).

Hér má svo sjá hópinn í andlegri og líkamlegri niðurkælingu á ströndinni í Miami.


Það hefur komist upp í deildinni að ég sé að blogga og heimtað að ég setji upp annað blog á ensku. Ég svara því sem svo að þetta sé fyrirtaks íslenskuæfing fyrir fólkið áður en það kemur í heimsókn heim. Svona ef gaurinn hjá Geysi skyldi ekki tala ensku.

Jæja, hér bíða 70 bls. af ritgerðum til að skemmta mér til morguns.

Net og danserí

Fyrsti skóladagurinn á nýju ári. Mætti gallvaskur samferða kennaranum (ekki með epli þó) í tímann en þar biðu hvorki meira né minna en rúmlega 40 nemendur sem stútfylltu þessa ponsulitlu kennslustofu auðveldlega. Náði að krækja mér í sæti en það sama var ekki að segja um þá 20 nemendur sem enn voru ómættir. Það var meira að segja fólk úti á ganginum sem varla get heyrt hvað væri að gerast, hvað þá fylgst með á töflunni. Kleinberg sagði að það eina sem hann gæti gert í stöðunni væri að setja fyrir dagleg heimaverkefni þar til fólk kæmist fyrir. Hann ætlaði þó að reyna að finna stærri stofu. Kúrsinn fjallar um net, eins og babblaði áður um, hvernig hægt er að samræma aðferðir úr alls konar áttum til að finna einhvern sameiginlegan grundvöll til að greina net. Ætlar að taka á alls kyns mismunandi netum, sem dæmi eru tengsl milli heimasíða Internetsins, tengsl milli próteina sem hafa svipaðar amínósýrur, alls kyns faraldursfræði á borð við raunverulega sjúkdóma og skoða hvernig fíkniefnamisferli breiðist út í tengslaneti skólanna (eða eins og kennarinn orðaði það, "Mig langar ekki að sprauta eitri í æðarnar mínar, en allir vinir mínir eru að gera það"), samvinnunet milli vísindamanna og að lokum tauganet í heilanum. Líst mjög vel á þennan kúrs, lofar mjög góðu. Hluti af vinnunni er að finna sér eitthvað gagnasafn og greina það (skoða eigingildi, etc.) - ef eitthvað áhugavert kemur út úr því getur maður jafnvel gefið það út. Er einhver með hugmyndir að áhugaverðu neti? :) Annars má hér á vinstri hönd sjá Fylkið og hægri hönd gamalt plot af AS-tengslum Internetsins.

Á nú bókaða fundi hjá sínum hvorum prófessornum á miðvikudag og fimmtudag varðandi rannsóknir þetta misserið. Áður en maður veit hvað kemur út úr því er erfitt að segja til um hvort maður taki fleiri kúrsa þetta misserið. Ætla samt að kíkja í 615 - Peer to peer systems í fyrramálið. Sama er að segja um aðra kúrsa, ég er loksins að reyna að láta verða af því að fara að dansa aftur. Er í bandi við helstu danskennarana hérna í bænum sem eru að ráðleggja mér eitt og annað, vonast til að geta kíkt og skoðað hópana sem fyrst. Það er bara svo gaman að dansa :-) Sömu niðurstöðu virðast aðrir íbúar hérna hafa komist að því það er varla fótað fyrir úrvali af danskennslu, alls kyns einkakennsla, fimm hópar á mismunandi stigum í leikfimikennslunni hérna í Cornell, og loks dansstaðir með Ballroom / Latin / Salsa / Jazz tónlist og endalaust af kvöldum hér í skólanum á borð við "Tango night", "Latin Dance night", o.s.frv.

Var annars að leika mér að Webcaminu mínu (Logitech) sem mér tókst að fá til að virka í Linux í gær. Skemmtilegt að taka myndir á borð við þessa. "Hvar er hvarpunkturinn?" ;) Set sennilega inn fleiri svona seinna meir...

Ekkert hefur heyrst frá þrautakóngum og drottingum svo þau virðast vera önnum kafin við að leysa núverandi þraut (Um hana Sturlu litlu sem gistir uppi á Esju). Gef því frest fram á svona fimmtudag/föstudag.

Kettir og velmegun

Lenti í því að kaupa kött (sjá mynd) í sekk fyrir jól. Lét nefnilega loksins verða af því að versla bókina Introduction to Algorithms sem er skyldueign í mínu fagi. Pantaði ódýrasta notaða eintakið á netinu og viti menn, hvað fæ ég sent heim. Jú, hvorki meira né minna en kínverska prentun af bókinni. Eintakið er þó á ensku, en það er prentað á nær gegnsæjan pappír sem er fjórfalt þynnri en klósettpappírinn inni á baði. Þannig að maður er aldrei að lesa bara eina síðu í einu, næstu opnur fylgja með í lestrinum. Fór fljótlega í það að reyna að skila henni, og eftir að hafa sannfært sendandann um að hann hefði snuðað mig bauðst hann til að taka hana til baka, en síðan hefur ekkert í honum heyrst. Þarf að hafa samband við Amazon sem fyrst. Annars er þetta fyrsta neikvæða upplifelsið sem ég upplifi við netverslun, bara ósköp þægileg og hentug leið til að versla. Vildi að maður vissi hvaða stærðir maður notar til að losna við búðarápið sem tengist fatakaupum svo maður kaupi það sem hentar á netinu. Hver veit nema maður þurfi á endanum ekkert að fara út úr húsi nema kannski með ruslið og til að sækja pizzuna til sendilsins. Þá er afgerandi líklegt að maður endi eins og ég á þessari mynd, velmegunin kemur jú til með að stinga mann í bakið á endanum.

Talandi annars um ketti þá verður maður að velta því fyrir sér hversu huggulegt það kynni nú að vera ef einhver stór dýrategund myndi taka mann upp á armana, tilbiðja mann sem guð og gefa manni mat, drykk og klapp þegar manni lystir. Engar áhyggjur af veiðum eða svoleiðis, þú bara liggur og sefur og lætur gæla við þig þegar þú vaknar. Þarft ekkert að hafa fyrir þessu, þetta er vinnan þín. Hann Beggi hafði einmitt orð á því að eftir B.S. próf frá háskólanum ætlaði hann að gerast köttur og láta klappa sér. Er þetta jú ekki það sem allt stressið sem maður gengur í gegnum snýst um, að geta slappað af seinna meir? Lifir maður ekki með þá gulrót fyrir framan sig að "bara n fleiri hlutir - þá er ég búinn og get lagst í afslöppun" ? Einhvernveginn tekst manni svo vart að narta í gulrótina. Kettir eru fyrir löngu búnir að átta sig á þessu, a.m.k. starir kisan mín oft á mig og hristir hausinn, "fattlausa mannvera". En þessi velmegun kattanna kemur reyndar í bakið á þeim líka, til að mynda er kisan mín ... ja, örlítið sælleg (sjá mynd, þessi jólasveinabúningur á víst að passa á fullvaxna kisu). Bara meira til að klappa. Heyrist samt á henni að hún sé bara nokkuð hamingjusöm, hef nefnilega fengið að heyra í henni hljóðið í gegnum Skype.

Var annars að koma af kvikmyndinni Munich eftir hann Steven Spielberg sem fjallar um (að stórum hluta skáldaða) eftiratburði hryðjuverkaárásarinnar á Ólympíuleikunum í Munich 1972. Get ekki lagt fingurinn á það hver eiginlegur boðskapur myndarinnar átti að vera, en ég get ekki verið sammála þeim sem segja að myndin skoði báðar hliðar á Ísraels- og Palestínudeilunni. Hún reynir frekar að sýna hvað ástandið er eitthvað vonlítið. Aftur á móti getur verið að hún gangi eins langt og hægt er að ganga hér í Kanaveldi, enda er hér mikill stuðningur við Ísraelsmenn. Gagnrýnendur annað hvort lofa myndina eða hata, Spielberg sem sjálfur er gyðingur hefur hins vegar fengið afburða slæma gagnrýni frá Ísrael þar sem þeim finnst hann hafa svikið þeirra málstað. Fyrirsagnir í dagblöðum þar segja t.a.m. "Við misstum Spielberg". Sjáið hana og dæmið fyrir ykkur sjálf, þetta er þó alls ekki hans besta verk hingað til.

Ég hafði vart lokið við að skrifa síðustu þraut áður en rétt svar barst. Vinningshafinn að þessu sinni er hún Erla sem kom strax auga á að egypsku rúninar mynduðu orðið LAUMUSPIL! Ég sem var með bakþanka með að þrautin kynni að vera of erfið, ét það ofan í mig ásamt hattinum. Hún hlýtur að launum mjólkurhristing (líkt og fyrri sigurvegarar með sömu skilmálum) þegar hún heimsækir Íþöku einn góðan veðurdag. Glæsilegt!

Þraut 4: Hún Sturla litla lagði af stað upp á Esjuna kl. 12 í gær. Hún gekk upp ákveðinn stíg og endaði uppi á toppi kl. 5 (hún var með steðja í bakpokanum). Þar sem hún var ofsalega þreytt ákvað hún að gista á toppinum (mjög lengi), og lagði af stað niður kl. 12 í dag. Hún stiklaði niður nákvæmlega sama stíg og hún fór upp, og var komin niður kl. 2. Var Sturla einhverntímann á nákvæmlega sama stað á nákvæmlega sama tíma báða dagana (þ.e. er einhver staður á stígnum þar sem klukkan var það sama þegar Sturla stóð á honum á leiðinni upp og á leiðinni niður) ?

(Halli: Ég hef sagt þér lausnina á þessari svo þú ert því miður ekki gjaldgengur þátttakandi, en þú leysir bara næstu þraut - nema að þessi gangi illa!)

Próflok = Annarbyrjun

Hamingjunni sé lof! Það verður sko feitt djamm um helgina (= bíóferð og skoðun ónámstengds efnis á netinu) sökum tímabærra prófloka. Ástandið endist þó aðeins fram á mánudag en þá byrjar skólinn. Hmmm. Held að þessi forritunarmál og þýðendur hafi bara farið ágætlega, en maður verður að bíða rólegur og sjá. Þannig er mál með vexti að hér er reglan sú að það skiptir ekki öllu máli hvernig þér gekk heldur hvernig þér gekk í samanburði við alla hina. Sem er frábært þar sem samnemendurnir mínir virðast bryðja próf og heimaverkefni eins og morgunkorn.

Þetta misserið tek ég í það minnsta áfanga að nafni 685 - Uppbygging upplýsinganeta sem meistari Jon Kleinberg kennir. Áfanginn fjallar í megindráttum um nýlegar rannsóknir um hvernig megi módelera og vinna úr upplýsingum í stórum netum (til að mynda Internetið :-), og hanna reiknirit þess eðlis. Sem dæmi má taka leitarvélar á borð við Google: hvernig veit Google hvaða síður eru áhugaverðar, og hvað tengist þínum leitarstreng? Þess ber að geta að Kleinberg fékk nú fyrir skömmu 500.000$ "Genius" verðlaun, m.a. fyrir módel af linkastrúktúr Internetsins sem að hluta til gerði Google einmitt kleift að framkvæma jafnnákvæma og hraða leit og þeir gera, sjá frétt hér. Ég var annars að kenna fyrir hann síðasta misseri sem var mjög gaman (það er pínulítið skrítið að umgangast frægt fólk) og fer nú á mánudaginn að ræða við hann um að rannsaka eitthvað sniðugt þetta misserið. Verð svo að jafnframt að kenna þetta misserið, í þetta skipti Diet-útgáfu fyrir grunnnema af Greiningu Reiknirita sem ég tók fyrir jól. Það verður upplifelsi - hér borga grunnnemar (eða foreldrar þeirra) nokkrar milljónir á ári fyrir kennsluna sem þeir fá, þannig að þeir reyna aldeilis að standa sig og eru sérlega kvikir. Að vísu er sjálfsmorðstíðni sérlega há í dýrustu háskólanum, t.d. í MIT eru heimavistirnar með ponsulitla glugga svo krakkarnir hoppi ekki út, og þar eru reglulegir frídagar sem virðist stuðla að lægri sjálfsvígstíðni. Sennilega er erfitt að segja fjölskyldunni að þú hafir eytt 4-5 milljónum og heilu ári til einskis ef þú fellur. Gaman af því.

Fékk svo senda þessa líka stórfínu ullarsokka frá henni ömmu gömlu á Hornafirði. Akkúrat það sem mig vantaði, allir aðrir hlutar skrokksins eru ágætlega varðir gegn kuldanum hérna. Í öðrum pósti voru svo heljarinnar ósköp af skattaframtalsupplýsingum og fleiri spennandi pappírar skyldir þessu. Hlakka mikið til að fara í gegnum skattakerfið hérna í Bandaríkjunum - miðað við hvað ég veit að er mikið af möppudýrum í öðrum skriffinnskugreinum hérna þá held ég mér bíði kvalarfullur dauðdagi á næstu vikum.

Það bárust tvær réttar lausnir því sem næst samtímis fyrir Þraut 2 svo við höfum TVO sigurvegara. Hvor hlýtur að launum FRÍAN mjólkurhristing (sjá mynd) þegar þeir koma hingað í heimsókn. (Má ekki nota með öðrum verðlaunum eða tilboðum. Má ekki afsala til annarra. Gildir aðeins í Íþöku, NY. Gildir meðan birgðir endast. Aðeins í tilskildum verslunum. Skilmálar gætu breyst fyrirvaralaust. Notist aðeins í neyð. Mjólkurhristingur gæti innihaldið hnetur í snefilmagni, og hugsanlega mjólk og unnar mjólkurvörur. Engin ábyrgð er borin á ánægju með innihald - en hér má annars finna fjandi góðan ís).

Magnús Indriði gaf eftirfarandi lausn:
7¹⁰⁰⁰ = (7⁴)²⁵⁰. Einingarsæti 7⁴ er 1, sbr. 7*7 = 49, 9*7 = 63, 3*7 = 21. Þá er einingarsæti (7⁴)²⁵⁰ einnig einn, því það breytist ekki þó hafið sé í veldið 250.
Þetta er hárrétt, og vel að merkja er pjakkurinn ekki nema rétt rúmlega 1 árs gamall. Geri aðrir betur!

Baldvin sendi þessa fínu lausn:
7¹⁰⁰⁰ ≡ ((-3)²)⁵⁰⁰ ≡ 9⁵⁰⁰ ≡ (-1)⁵⁰⁰ ≡ 1 (mod 10).
Ljóst að elegansinn er fyrir mestu. Ljómandi.

En örvæntið eigi, hér kemur hún:

Þraut 3: Hvað stendur hér?

Jæja, þá er að hlýða skrokknum og enda þetta 21 klukkutíma ys. Þarf líka að safna kröftum til að geta verslað afmælisgjafir handa systur vorri árla morguns. Góða nótt.

Utah-ferð í mars

Þá var maður að enda við að skrá sig í enn eitt ævintýrið hérna úti. Nánar tiltekið erum við félagarnir á förum í bakpoka- leiðangur til Utah yfir hið rúmlega vikulanga vorfrí (spring break) dagana 18. til 26. mars. Það skemmtilega við þetta er að ferðalagið er áfangi hérna í Cornell sem lesa má um hér. Þá er bara að fara að hlakka til að hitta fleira fólk, og vona að hópurinn sem skrái sig verði góður. Hér er myndatvennd úr leiðangrinum í fyrra af sömu síðu.

Skólinn er þekktur fyrir að leggja talsvert mikið upp úr íþróttakennslu svo að hér má nokkurn veginn finna hvaða hreyfingu (og hugaríþrótt, sbr. skák)sem vera skal. Sem dæmi um yfir 100 slíka kúrsa sem eru í boði eru bogfimi, köfun, jöklaklifur, "whitewater kayaking" þar sem þú ert á kajak í flúðum (svipað og river rafting), keila, sundbolti og þríþraut. Að auki bjóða þeir upp á alls konar ferðalög á borð við bakpokaferðina til Utah. Verst að maður skuli alltaf vera heima að læra :-) Vona að það breytist þetta misserið.
Annars er maður búinn að vera lesa stíft fyrir prófið á morgun, alltaf fjör að læra efni heils misseris í einhverju (í þetta skipti þýðendur) á 24 tímum. Orðinn þreyttur á þessu prófastússi og vil bara fara að byrja önnina sjálfa - sú ósk mun rætast sjálfkrafa á mánudaginn.

Af öðrum fréttum leið mér hálfilla yfir að vera með þrefalt styttra nafn en meðal Indverji hérna í deildinni, svo ég skrifa núna undir bréf til þeirra sem Ymiramakrishna Venkitasivaganapathy Subramanian.

Það hefur verið eitthvað dræm þátttaka í þraut 2 svo ég neyðist því til að færa frestinn fram yfir helgi. Ber mér að álykta sem svo að þessi þraut sé of erfið og að næst vilji fólk fá gátu aftan af Andrésblaði? Hugsanlega hefur fólk bara misst af þrautinni svo ég endurtek hana hér:

Þraut 2: Hvað er í einingasæti tölunnar 7¹⁰⁰⁰? (t.d. er 8 í einingasæti 2¹⁵ = 32768). Hvernig fannstu svarið?

Af ýmsu

Það hlaut að koma að því að bærinn lifnaði aftur við. Rétt fyrir jól hurfu allir íbúar Íþöku af strætum og götum og hafa verið fjarri þangað til í fyrradag. Svona er hafa mánaðarlangt jólafrí í skólanum - það bara gufa allir upp og fljúga á hlýrri slóðir. Einföld afleiðing er að hér er allt lokað á meðan, svo nú þegar fólk er snúið aftur fær maður fjölbreyttara fæði til ánægjulegrar tilbreytingar.

Ég veit hins vegar ekki hvaða kjána datt í hug að skella á aukaprófum í janúar vikuna fyrir byrjun misseris. Af spjalli við samnemendum að dæma er kæruleysið fyrir prófin algjört, og fólk segist almennt aldrei hafa upplifað annan eins einbeitingarskort. Sem er sennilega hluti ástæðunnar fyrir því að ég sit hér og blogga með óopnaða námsbók mér við hlið. Annars fór prófið í gær svona la-la, held ég hafi náð að miðla helstu hugmyndunum en framsetningin var ónýt. Sjáum til hvernig fer. Annað eins á föstudaginn.

Til að hjálpa til við próflesturinn horfði ég á fyrstu þrjá þætti fimmtu seríu af 24, mér til mikillar ánægju og yndisauka. Maður hefði haldið að það gæti verið orðið þreytt að sami maðurinn bjargi heiminum á sólarhring a.m.k. fimm sinnum, og það hlyti að vera búið að finna alla svikara og uppljóstrara úr hópi "góðu gauranna" - en það er nú svo sannarlega ekki. Bara hörkuspennandi og fínt, höfundunum tekst enn að koma manni í opna skjöldu og tvísýnar aðstæður. Annars tókst mér að dreifa fíkninni og gera fleiri samnemendur háða þessum mánudagsadrenalínskammti.

Hér að ofan má sjá sumarmynd af Cornell turninum (nánar tiltekið McGraw tower) sem er svona helsta kennileiti skólans. Það má líka sjá móta fyrir honum á loftmyndinni minni hérna hægra megin á síðunni, einhversstaðar fyrir miðju. Hér er annars önnur loftmynd tekin í sömu ferð af Campusnum. Minnir mig á það að allir bæklingar og allar myndir sem unnt er að sjá af Cornell eru teknar um sumar, þó hér sé nokkuð langur vetur. Hefur vafalaust áhrif á valið hjá þeim sem eru að sækja um hér og í Californiu. Annars verður sennilega svona "Visit day" hérna aftur í mars (ég mætti á það í fyrra). Við erum að spá í að bjóða okkur fram sem "Visit day czars" sem þýðir að það er í okkar verkahring að reyna að gabba sem flesta af þeim sem er hleypt inn í doktorsnám í tölvunarfræðinni hérna til að koma hingað og fara ekki annað þegar þeir koma hérna í heimsókn. Í fyrra var campusinn sýndur ásamt öllum því besta sem hann býður upp á (heimatilbúinn ís!), fólk sett á skauta og blætt í Jon Stewart uppistand fyrir nemendurnar. Að sjálfsögðu var svo snætt á bestu veitingarstöðum bæjarins. Væri ekki amalegt að fá þessi fríðindi aftur :-)

Fólki gekk svo eitthvað erfiðlega með þraut 1, svo að hér er komin lausn og önnur þraut. Ekki gleyma því að það eru vegleg verðlaun í boði! Svar berist hingað sem comment í síðasta lagi á föstudag, en þá verður sett inn lausn og ný þraut.

Þraut 2:
Hvað er í einingarsæti tölunnar 7¹⁰⁰⁰ (þ.e. aftasti tölustafurinn)? Verðlaun eru veitt fyrir rétt svar með útskýringu. Athugið að það þarf ekki stærðfræðilegan bakgrunn, né risareiknivél til að fatta þetta, bara smá fikt.

Lausn á þraut 1:

Sjá lausn

Spurt var hvort lita mætti eftirfarandi net með þremur litum þannig að aðliggjandi hnútar hafi mismunandi lit, og þannig að hver litur birtist í einhverju horni ysta tígulsins.

Það er því miður ekki hægt, og við sýnum það hér. Ímyndum okkur að miðjupunkturinn sé litaður rauður. Þá er ljóst að hinir fjórir grannar eru bláir og grænir á víxl. Við megum gera ráð fyrir að netið sé litað svona (við getum líka snúið því um 90 gráður).

Reynum nú að lita "norðvestasta" hnútinn, þ.e. þennan sem er milli þess að vera lengst til vinstri og efstur. Sá hnútur getur verið annað hvort rauður eða blár (þar sem hann á grænan granna). Ef við litum hann rauðan, þá verður hnúturinn lengst til vinstri að vera grænn, suðaustasti hnúturinn að vera rauður, og svo koll af kolli í kringum ysta tígulinn. Við höfum ekkert val. Á sama hátt ef við litum norðaustasta hnútinn bláan, þá verður nyrsti hnúturinn að vera rauður, norðaustasti hnúturinn að vera grænn, og aftur koll af kolli í kringum tígulinn.

Í báðum tilfellum fá andstæð horn á tíglinum sama lit. Það þýðir að við getum ekki haft þrjú horn með mismunandi liti. Ef við hefðum valið einhvern annan lit en rauðan fyrir miðjuna myndum við lenda í nákvæmlega sömu hremmingum, bara með víxluðum litum.

Raunar er þetta net hannað til þess að fá fram þennan eiginleika, og er notað til að sýna að það er jafnerfitt að athuga hvort lagnet sé þrílitanlegt og hvaða annað net sem er (verkefnin eru bæði NP-complete).

Kuldabolinn

Sem Íslendingur ætti ég að vera löngu búinn að rita eitthvað um veðurfarið hérna. Venjulega er Íþaka helfrosin yfir veturinn. Hins vegar ákváðu veðurguðirnir að breyta aðeins til og taka smá frí, svo fyrir tveimur dögum var hér 12 stiga hiti - það er hlýrra en í Aþenu á sama tíma! Þeir er nú aftur komnir í vinnuna svo við megum eiga von á 14 stiga frosti ásamt miklum vindi og snjókomu í kvöld, en það er svona álíka kalt og 20-25 stiga frost í logni. Ekki mjög spennandi að fara út úr húsi :-)

Samkvæmt Morgunblaðinu (sem aldrei lýgur, þeir bara vita ekki betur) er -2°C í Reykjavík í augnablikinu. Útlendingum gengur afar treglega að skilja þetta, enda stangast þessar upplýsingar alfarið á við eftirfarandi staðreyndir:

• Ísland er norður í rassgati
• Ísland heitir ÍSland.
  

(Mótsögnin kemur yfirleitt fram í nafninu). Að sama skapi fæ ég ávallt sömu viðbrögð þegar mér er kalt, eða þegar fólk uppgötvar að það er 10 gráðum hlýrra í herberginu mínu en annarsstaðar í húsinu: "But you're from ICE-land!!" Útskýringar þess eðlis að það sé í raun ekkert voðalega kalt á Íslandi fá lítinn hljómgrunn, enda augljóslega um bullandi mótsögn að ræða.

Annars er maður enn sérlega duglegur við það að einbeita sér ekki að próflestri. Til að kóróna þessa baráttu horfði ég á mynd Peter Jackson (mamma: hann gerði Lord of the Rings og King Kong), Heavenly Creatures. Myndin er byggð mjög staðfastlega á sönnum atburðum í Nýja-Sjálandi þar sem tvær ungar vinkonur (15 og 16 ára) sem hafa afar náið samband í sameiginlegum ævintýraheimi, svo náið að foreldrarnir vilja slíta á það með þeim afleiðingum að þær hefna sín. Myndin hlaut Óskarstilnefningu, og var einnig upphaf leikferils Kate Winslet. Mæli með henni. Sjáið líka City of God (Citate de Deus) ef því hefur ekki þegar verið komið í verk.

Bíð svo spenntur eftir að einhver leysi þrautina sem ég smíðaði í gær.

Jólasól

Fékk rétt í þessu senda hrúgu af jóla- og áramótamyndum að heiman, bara svo maður viti nú hverju maður hafi verið að missa af. Gaman að sjá hvernig þetta allt saman var. Já, það hefði nú verið ofsalega gaman að kíkja heim, en kannski er líka sniðugt að sjá hvað fleira gerist í heiminum á þessum tíma. Mótelið sem við gistum á (Bates' Motel) á aðfangadagskvöldi í Flórída bauð okkur til að mynda þetta í morgunmat. Ekki kornflex eða brauð, bara djús og sykurhúðuð piparkaka. Nú er ég þekktur fyrir sykurneyslu (sérstaklega af fólki sem ekki þekkir til systra minna) - fékk hér til dæmis tæpt kíló af sælgæti í afmælisgjöf - en þetta var ekki alveg að gera sig sem morgunmatur.
Sérstaklega ekki á jóladag þar sem maður er langvanur alls kyns góðgæti sem þó telst matur. Til að gjörsamlega útiloka að um jól gæti verið að ræða sólbrann ég herfilega seinna um daginn, Indverjunum til mikillar skemmtunar. Slíkt var áður útilokað í mínum huga, og fljótlega var það eina sem minnti á jólin í kringum mann stöku yfirskreytt jólatré með spreyjuðum jólasnjó í 25 stiga hitanum. Þess má geta að kvöldverðurinn okkar á jóladag innihélt snigla, froskalappir og krókódílabita. Já, svona var nú það. En myndin að ofan er annars úr Orlando Studios.

Hin heljarinnar mörgu afmælisgjafir sem ég fékk sendar að heiman eru búnar að liggja hérna innpakkaðar á gólfinu og hvísla "psst, það er enginn hérna, það tekur enginn eftir því þótt þú opnir mig fyrir afmælið þitt." Endaði með því að ég setti þær bara aftur ofan í kassann og kveikti á tónlist til að yfirgnæfa þær. Þar til í gær, en þá mátti ég víst löglega opna þær. Og viti menn, nú er minn bara búinn að fylla fataskápinn og kominn með alls kyns sniðuga og gagnlega hluti (á borð við uppskriftabækur, hanska og jólasmákökur). Kærar þakkir heim!

Þraut: Hér er smá þraut fyrir þig, lesandi góður. Ég læt þig hafa þrjá liti, rauðan, bláan og grænan. Er hægt að lita hnútana á eftirfarandi mynd þannig að tengdir hnútar hafi mismunandi liti og þannig að hver litur komi fyrir í einhverju horni ysta tígulsins? Hvernig þá eða af hverju ekki?